海洋公園噚日為園內3隻大熊貓舉行「大熊貓時尚生日派對」，大熊貓安安31歲啦，已經係老伯伯一名。至於今年12歲嘅盈盈，喺7月初就出現懷孕迹象，包括減少進食、增加睡眠及休息時間、外陰腫脹及荷爾蒙水平變化，不過亦可能「食詐糊」係假懷孕，園方正密切留意盈盈嘅情況。
盈盈再現懷孕迹象
海洋公園陸生動物部高級館長祝效忠指，今年3月底盈盈同樂樂曾嘗試自然交配，但唔成功，用咗樂樂嘅新鮮精液同安安嘅冷藏精液進行4次人工授孕，希望增加懷孕機會。但因為大熊貓懷孕期由70天至300多天，盈盈𠵱家又較敏感，所以無法進行超聲波檢查，暫未確定係咪真懷孕，過去盈盈亦唔止一次「食詐糊」。
為慶祝大熊貓生日，由即日起至8月27日，海洋公園推出港人「買二送一」門票優惠，購買兩張成人門票並出示香港身份證，可獲贈小童門票乙張，免費小童門票要喺換領當日由兩位付費成人陪同入場。