噚日港超聯球隊動作多多，上晝有飛馬友賽夢想FC（見另文），下晝就有上季菁英盃盟主和富大埔舉行新季拜神儀式，球隊主席蔡尚圻仲喺儀式上公佈已簽入曾效巴甲法林明高同日聯鹿島鹿角嘅前鋒伊高沙杜尼，頂替轉會去咗傑志嘅盧卡斯。
原來呢位巴西前鋒係將門之後，佢老父艾辛度喺1993年同薛高一齊效力過日聯勁旅鹿島鹿角，喺日本頗具名氣架！大埔主教練李志堅話，伊高沙杜尼並唔係傳統嘅9號前鋒，踢法既快速又具入楔能力，仲有相當高嘅入波能力，希望佢加盟可為球隊帶嚟驚喜。
堅sir話唔排除開季前仲有新球員加盟，而大埔月中會去泰國集訓，仲安排三場熱身賽，包括對曼谷玻璃等，而球隊呢排會同香港U18同標準流浪「拍跳」。