近年唔少演藝界人士買磚頭自用或者投資，除咗住宅之外，工廈亦比較受歡迎。有「歌神」之稱嘅張學友不甘後人，靜靜雞同太太羅美薇斥資1,380萬元，買入柴灣百樂門大廈兩個中層相連工廈單位。
根據土地註冊處資料顯示，柴灣嘉業街12號百樂門大廈9樓8及9號室，合共3,176呎，由凱美發展有限公司買入，成交價1,380萬元，呎價4,345元。凱美發展嘅公司董事包括有張學友同羅美薇。
呢幾年有唔少藝人買東九龍工廈，好似觀塘唔少廠廈都有演藝界人士身影，但就比較少聽聞佢哋會喺港島區買嘢。學友似乎就對港島區物業情有獨鍾，佢十幾年前，已經喺黃竹坑南匯廣場以663萬買入多個單位，夾埋有近3,500呎，自用作為錄音室同歌迷會會址。