朋友之中有一位股神阿車哥，車哥老早叫熟朋友留意大酒店呢隻股票，又在報紙推介，當時大酒店股價係八個幾，主要理由係大酒店嘅PB（市帳率，即股價與資產淨值比率）大約係0.4，車哥話好冇理由，應該入市買入，佢話如果PB升番上去0.5-0.6，已經好有賺頭。之不過，車哥講完，大酒店股價照樣平穩唔郁，車哥當然繼續持有同佢鬥好耐性。
哈，點知到咗七月，有消息話一個新加坡商人蔡華波大手購入大酒店股票，已達必須披露持股量階段。消息一出，大酒店股價急速上升到近17元，之後回落到14元，車哥當然笑到見牙唔見眼，前星期下大雨之日，請佢啲老友到銅鑼灣登龍街東來順大擦一番。食完落樓，想搵的士，難咯，女編輯有事要急走，不顧大雨濕身（有雨遮只係聊勝於無）行去時代廣場的士站，只見人龍約一百人，的士就只見幾架，情急之下，急忙再行去銅鑼灣地鐵站（落雨就知路遠，女士行隧道要近十分鐘先到），坐地鐵到金鐘，再去的士站排隊。阿車哥呢？從女編輯得知去時代廣場搭的士唔掂，一時唔知點好，旁邊老友突然想起有Uber，急call之。吓，五分鐘之內就有一架車駛到登龍街接車哥上車，載佢返屋企，雖然車資貴啲，車哥一啲都唔介意，大讚Uber有用。
Uber被政府打壓，控告司機，曾令司機一度走避風頭，唔知點解，最近啲司機又試活躍番咯噃。有路邊社消息講，自中文大學發表民意調查結果，市民之中，有80%贊成有Uber之後，幾注重民望嘅林鄭月娥開始轉變態度，創科局局長楊偉雄也跟住軟化一啲，口氣比較寬鬆。事實上，Uber在特殊情況下，確實補充到香港的士服務之不足，例如教授A住在九龍塘宿舍，通常下午要三四點坐的士去養和醫院覆診，因行動不便，想在宿舍樓下上車，打電話去的士call台，十次有十次都搵唔到車，幸有學生提醒佢搵Uber，於是試用，一call就掂，架車直情駛到近宿舍門口接教授A去養和，而今已到無Uber不可嘅地步，自然百分之一百反對政府趕絕Uber。香港唔夠的士，唔夠的士司機，Uber嘅營運模式就吸引不同人士自願加入做司機。大編輯上星期大雨之夜，call到一架，司機話佢係退休公務員，咬緊糧，鍾意做晚上至凌晨一更，天光就返屋企，搵多一份糧！呢樣就係市場力量，政府要諗方法疏導呢類新共享經濟模式，唔係禁止、趕絕。