周日阿聯酋盃，阿仙奴雖然以1:2輸畀西維爾，但仍靠較多入球贏得冠軍（圖）；相反兩戰全勝嘅西維爾只能排第二。
東道主阿仙奴面對西維爾，兩隊半場互無紀錄。換邊後，西維爾靠祖亞昆哥利亞喺49分鐘打破僵局。62分鐘，兵工廠右翼衞阿歷士張伯倫爆落底線傳中，前柱嘅韋碧克第一時間施射但「撻Q」，個波稍為改變方向，剛好落正喺新加盟嘅拿卡錫迪腳下，佢輕鬆射成1:1扳平。69分鐘，阿仙奴後防突然空晒，當時西維爾左路界外球，落喺禁區頂嘅尼桑斯腳下，佢起腳一射，個波中內柱入網，西維爾最終贏2:1。
西維爾兩連勝得亞軍
由於阿聯酋盃賽制奇怪，除咗贏波有三分同和波有一分之外，每入一球都有一分，如果同分嘅話計得失球同得球。阿仙奴同西維爾都以九分並列榜首，雖然兩隊得失球一樣，但阿仙奴入球比西維爾多三球，所以兵工廠一勝一負照贏冠軍，而兩戰全勝嘅西維爾就得亞軍。
另外，阿仙奴現時陣中有多達七名主力球員剩番一年合約，領隊雲格賽後形容呢個係一個「理想情況」：「我覺得冇問題，得番一年約仲好，佢哋（球員）會更加去表現自己。」
