一地兩檢，司局長促銷，嗱嗱聲埋來睇有你jetso咁款。有着有唔着，唔好等懶人包話你知，自己戙高床板諗吓：
一，根據基本法租約，你租了三房兩廳單位，租賃期至2047。20年後無啦啦業主睇中你個主人海景房，要租返。租客有租約保障，但業主笑住毀約，用筆打了個大交叉在基本法上面。你拿着這張大交叉合約，見到業主開始搬行李入屋，放在房門口的行李凸咗幾支槍出來，咁都叫做有你着數？
二，既然立心毀約，以後大業主睇中邊忽就租返邊忽，你間屋逐忽逐忽消失，最後連廁所的屎忽位都被迫租出！租客放心，大灣區等住你去安居樂業，狼英測量推介，一屋十廁！
三，保安局誓神劈願指，只有內地公安在西九執法才能確保內地通緝犯不會犯境。公安超然於差佬之上，差佬唔使去西九行beat，差餉大減，便民紓困，立竿見影。下一站，注意，即是下一刀，割硬中環！中環被中資掃盤插旗，加埋公安進駐，強國一條龍，將基本法扔入垃圾箱，一國一制，比梁愛詩預見的更早歸位，民x聯熱烈彈琴，成功爭取！闔家富貴！