「娛樂大亨」林建岳唔止識飲識食，對足球亦有所好，旗下麗豐（1125）近日就同勁旅「皇家馬德里」簽特許協議，將會喺橫琴創新方項目第二期，興建一座足球娛樂體驗中心，成1.2萬平方米咁大，仲可以用皇馬嘅特許知識產權當收入，首階段用10年，可選擇續約10年。
呢個足球娛樂體驗中心，會提供各種與足球相關之互動體驗、餐飲店及特許零售店，即係有得玩、有得食，仲有得濕平，相信會吸引到好多想去朝聖但冇長假期嘅球迷，近近哋去止吓渴。
不過留意番，呢個項目第二期，連塊地皮，以及點樣發展，都仲同橫琴政府磋商緊㗎。
查實岳少早於80年代已經同足球結緣，1980年代初，聯同鍾立全入閣東方體育會，先後成功奪得高級銀牌、總督盃與足總盃當時本地三大盃賽冠軍，但始終拎唔番甲組聯賽冠軍，成為遺憾。
同另一支本地球會南華亦有淵源，佢1988年離任南華足球部主任時「帶兵下山」，帶住8個南華人入主花花、易名為麗新花花。