「殺人場」再現！九龍灣公園仿真草場，早兩季係港超聯標準流浪主場。不過，呢個球場最出名係好多球員喺度受傷，噚日朝早又有今季由傑志借去夢想FC嘅羅梓駿被飛馬守衞梁諾恆撞低落地意外斷手，估計要休息一個月。
飛馬夢想友賽踢出火
今季港超聯據聞呢個月尾就開鑼，各隊已準備迎接球季，自然要踢熱身賽磨合默契同提升球員狀態，而香港飛馬噚朝約咗新軍夢想FC喺九龍灣公園「拍跳」，我求大俠同唔少球迷摸落去睇吓兩隊啲新援有冇料到。不過，天氣咁熱，新援初嚟到，真係好難睇到乜，但兩隊啲外援可能好耐冇鬥過波，第一節就有飛馬中場利馬與夢想守衞柏保路爭波爭出火，懷疑利馬手踭撞倒柏保路，雙雙倒地後互相指罵，之後互有動作，要由雙方隊友勸開。
呢單小衝突平息後，今季由傑志借畀夢想FC嘅守衞羅梓駿喺第二節諗住護住個波出底線，點知被身形好健碩嘅梁諾恆從後撞到彈開，可能落地唔好，右手就彎咗，睇落多數斷咗，即刻call救傷車到場送咗去聯合醫院；夢想行政總裁梁智駒噚日話，初步檢驗完，證實手骨斷咗，至於使唔使做手術，就要等醫生進一步檢查。飛馬靠塞爾維亞新前鋒伊高喺第二節射入全場唯一入球取勝。
鄭少偉夏志明都出過事
其實九龍灣公園球場喺2014年改鋪仿真草重開後，已經有唔少球員話呢個場有問題，話個場地好啜腳，又多膠粒，仲有唔少凹位，賽前又唔灑水，喺度比賽落地唔好，就好容易扭傷，過去有唔少球員喺呢個場受重傷，包括鄭少偉、夏志明、莫斯奧及麥保美等。雖然上季呢個場冇安排踢港超聯，但場地情況冇乜改善，踩落去似仲鬆過以前。
夢想FC教練梁志榮賽後話：「其實羅梓駿已經食晒個位，細佬（梁諾恆）仲撞埋去，可能落地唔好，呢啲意外都好難避免到，估計佢要唞一個月。呢個場每次比賽都有事發生，轉返草地可能好啲。」