港鐵正義男一句：「我真人唔靚仔」，弄得大家更肉緊，覺得他更靚仔。
損友認為此乃以退為進，令人為他不值，咁都唔靚仔，明星都沒幾個像樣了云云。又認為，唔止靚仔，仲好謙虛，有品又有樣，天下無雙。再認為，相由心生，見義勇為又謙遜，唔靚都變靚。損友一錘定音：自覺靚仔的靚仔，往往靚得好醜。
此話有理，但有理得好無奈，難道唔知醜的人，會醜得好靚乎？不會，長得不怎麼樣，即時自貶幾千里說我很醜，別人只會答：你都幾老實。
我認為，聽話聽重點，人家說的是真人唔靚仔，表示其靚樣，皆為圖像所生之知見障，即係所知所見，被照片蒙蔽了真像，簡單講，即係上鏡靚，鏡頭以外還好。損友認為這樣會講說話，有點可惜，過謙亦近乎虛偽。
我對損友言：你想人點答呢？點答都係死。真係好人難做，靚仔更難為，唔知醜係罪，唔知靚都唔得，難怪有人說，這些年來，我們失去最多的是信任，學會的是陰謀論。
講起陰謀輪，另一損友留言，說蘋果是照妖鏡。最初以為是說蘋果像正義男那樣，仗義執言讓群妖現形，但不可能，講話那麼肉麻就不叫損友了，一想即明：蘋果選照片有一手，看誰不過眼，非醜不選，個樣唔妖都變妖妖聲。
蘋果揀相，是有陰謀令醜人變更醜，有比較人模人樣的疑慮不採用？話說一個個幫一地兩檢做sell屎做醜人的新官舊權貴，有一兩個本來五官分佈比例，很像我中學時的阿sir，唔靚，不醜，但一臉忠厚，屬於老好人樣。如今憑玉照認人，竟無一個像男兒，清一色甩皮甩骨，相由心生都唔會生長得咁快啩。
如此看來，照妖鏡是一地兩檢而未必是蘋果；如此想來，正義男話「我真人唔靚仔」，聽在講嘢講到唔知醜的人心裏，可能也很想說：我真人唔醜樣，我真人講人話時，我老婆仔女都話我好靚仔，只有毒果污衊我真人唔靚仔而已。
我估，欲知真相如何，且看動物傳心師分解，憑蘋果刊登保皇黨人玉照，評估其講人話時真人靚定唔靚了。
損友聽罷長嘆：以貌取人多餘，男人唔駛靚。
我聽罷也長嘆：唔係，有人叫大台請正義男拍戲，我是民記，立刻請正義男入黨，變正義建港聯盟，就知真人靚唔靚，過得一排，更知相由心生有無咁大影響。