特首林鄭月娥盛傳同「梁粉」財爺陳茂波向來唔太啱嘴形，林鄭對波叔果然老實不客氣，噚晚出席工業總會周年晚宴致辭時對住90幾圍嘅嘉賓寸爆對方，佢話陪同出席晚宴嘅有一位司長同5位局長，反映政府對工總嘅支持：「不過財政司司長就走咗，佢咁短時間都嚟一嚟，因為佢知我要點名，佢嚟打卡呀！」呢番有骨說話惹嚟台下賓客拍爛手掌。據知波叔另有公務安排而要早走。林鄭仲向工總公佈好消息，話喺政綱承諾嘅「兩級制利得稅」已經做緊籌備工作咯。
林鄭之後逐一介紹在席5位局長，提及保安局局長李家超要出席，因為要話畀工總聽，高鐵一定可用一地兩檢開通，日後又會要求公務員事務局局長羅智光同勞福局局長羅致光出席工總活動；政制局局長聶德權都要現身，因為呢個局今年喺政制方面可以休息，但內地事務要急起直追，林鄭離開時後冇回應，係咪即係唔會重啟政改呢。