恒生「新一姐」鄭慧敏（Louisa）7月上任剛滿一個月，噚日首次喺業績會亮相。Louisa之前喺匯豐工作多年，上任「新一姐」前又被派駐倫敦，離開咗香港三年半時間。不過，Louisa就話自己都一直有留意香港市況，會邊學邊做，而且上任以來體會最深，就係恒生團隊精神好重，一班同事好幫得手，雖然只係返工一個月，但感覺已經嚟咗好耐。
Louisa一直擅長零售銀行同財富管理業務，之前喺滙豐就擔任零售銀行業務環球主管，而恒生零售銀行又係最出名。Louisa就話，家陣零售銀行佔恒生盈利貢獻超過一半，自己都希望會繼續保持競爭力，最重要係提升服務水平，好似加強網上銀行服務咁，盡量用多啲數碼科技，等大家都方便咁話。