近年動漫會場嘅Game Girl引入外援，以台妹迎港男，睇落輕鬆擺甫士，實則有苦自己知。好似24歲嘅陳葳，電玩商包機票同食宿，接佢由台灣來港，26日抵港就試穿工作制服，翌日開工，每日做7至8粒鐘。
第一次出國工作，佢話喺台灣要自己化妝同整頭髮，香港就有化妝師待命；台灣大多只須影相同介紹產品，香港就要出埋活動，要同本港Game Girl比賽打機。
台港兩地都有龍友，首度來港做嘢嘅陳葳，對本地龍友極好奇，因圍住佢拍照嘅龍友係台灣數量嘅好幾倍，「他們都要拍很久，不累嗎？我覺得他們很辛苦」，當然佢話唔會感到唔舒服，一樣擺甫士任拍唔嬲。佢都話唔明港男影相時，點解要企得咁近？佢喺台灣做咗3年Show Girl（即香港嘅Game Girl），話從未遇過「鹹豬手」。