早排有動物傳心師連玩具龜「布歐」都可以溝通到，帶俾大家一陣歡樂恥笑聲。而馬匹智商大約只同三歲細路仔差唔多，不過打假拆穿西洋鏡嘅能力，似乎唔錯喎。
近日外國有人為咗Test一下，馬匹究竟有幾聰明？於是放咗一隻馬公仔喺牧場，扮作牧場內其中一匹雌馬嘅子女。之後呢匹雌馬果然行埋嚟，仲聞咗幾啖隻馬公仔，發現隻馬BB係假嘅之後，就一嘢毫不留情咁踢開個公仔，仲嬲嬲哋頭也不回咁離開現場。所以唔好以為有啲馬個樣傻吓傻吓，好似好易畀人呃，分分鐘你整蠱佢哋，啲馬醒番隻粗壯肥美嘅金華火腿畀你嘆！
其實好多馬鍾意起飛腿踢人，除咗因為發嬲，更多時係保護自己嘅表現。事關馬匹天性非常細膽，少少嘢都會嚇親。因為佢哋視覺有別，就好似有個放大鏡喺前面咁。例如人類手掌，喺佢哋眼中變到網球拍咁大；而且視力範圍廣闊得驚人，只得約3度嘅死角盲點，交是更易感覺到四周危險，變得容易受驚。所以馬匹一旦嚇親，認為自己受威脅，咪起飛腳保護自己囉！