民主黨有個「美容專員」，過去多次揭發美容業不良銷售手法，本身係深水埗區議員嘅佢，過去亦好留心女士們扮靚需要，喺區內搞過「Gel甲班」，佢就係30歲嘅袁海文嘞！講開女士，「專員」話有位女性影響佢一生，就係已過身嘅婆婆，教識佢行公義，憐憫有需要嘅人，一生受用。
遇法國工潮激發從政
袁海文嘅外公年輕時已離世，當年家境唔算好，婆婆要獨力養大小孩當然吃力，但原來一直低調行善，直至有日屋企收到內地山區一個大學畢業生嘅多謝信，家人先知外婆有助養內地兒童，但從未張揚。
袁海文就讀拔萃男書院，好鍾意踢波，識到一班波友，至今都不時聚頭。2003年沙士期間考會考，考完試同書友一齊參與7.1遊行，嗰一年男拔亦轉為直資，變得貴族化，令佢開始深思身邊嘅事。
理工大學工程及工商管理雙學士學位畢業嘅袁海文，直到讀大學去法國交流，先真正激發立志從政，佢話當年喺法國搭火車，咁啱遇上工潮，工人要捍衞退休保障，引發全國大罷工，「呢件事令我諗到對社會不滿要行動，要付出，要身體力行」，激發從政之路。