今次真係準過蘇師傅。上周二才話白宮新傳訊總監Scaramucci不是甚麼好東西，沒想過一個星期之後就靈驗。
有睇本報國際新聞都應該知道，呢位S總監上星期戰神上身，唔單止無端端向白宮幕僚長隔空發炮，夾硬話人哋向傳媒放料，爆佢啲財務資料（事實是記者話嗰啲根本係公開資料），仲蠢到打電話畀《紐約人》記者，不停講粗口鬧佢心目中的白宮內鬼，其用字之粗鄙，固然有失身份。
對行家來說，此君真係連公關ABC都唔曉，咁嘅水平，難怪我哋上屆新聞聯絡專員會自比白宮發言人，真係有得fight。請看接佢電話那位《紐約人》記者 Ryan Lizza 點講。
‧「佢周三晚打來，明顯唔開心」：各位，開唔開心係你嘅事，聯絡記者前可唔可以先收拾心情，想點？搵記者出氣定吐苦水先，兩者都好唔專業。
‧「佢打嚟唔係畀料我，反而問我邊個放料我知白宮有秘密晚宴……」：第一日做公關咩（噢，sorry，人哋真係入行幾日咋！），居然夠膽問記者資料來源，上到庭都未必要答你呀，仲問完又問，甚至恐嚇炒晒傳訊組班人。Ryan話佢笑咗，心諗：唔係以為咁就迫到我就範呀！
‧「佢滿腦子洩密同炒人……電話係佢打來的，係咁盤我，但一句都無提要off the record……」： 兄弟，今時今日，講到明off the record（背景資料，不予報道）都唔係個個會守規矩，你提都唔提就咁同記者「祼談」，事後又話「信錯記者」，咁天真咁儍，真係幫你唔到喎。
Well，小學雞總統用小學雞公關，其實好合理嘅。
彭瑪莉
mailto:[email protected]