【本報訊】動漫節吸引不少市民昨趁周日進場，場內擠滿人，有賣動漫《銀魂》木刀「洞爺湖」的展商三日已賣逾150把。「你好毒呀！」，動漫節亦吸引被標籤為「毒」的宅男宅女離開家門，但所謂「毒」又如何定義？《蘋果》訪問一眾動漫迷訴說心底話，自認「毒」的人多數不介意別人眼光：「如果自己興趣都介意人笑，咁有乜意義？」
以輕小說及周邊產品為主打的香港角川，中午時分有近百人輪候入攤位購物。銷售及市場代表吳浩明指人流不俗，限量福袋在第二日上午售罄。代理多款動漫作品的羚邦今年以《銀魂》為攤位佈置主題，銷售代表Jackie表示售230元的「洞爺湖」木刀三日已賣逾150把。
坊間流行指別人「毒」，據稱是來自日本網絡討論區指單身男性是「獨男」。中三同學Anson認為，「（指人）過份沉迷，可能着晒（動漫）衫，將周圍嘅嘢換晒做二次元，咁就係有少少毒」。Cosplayer小跳、甘樂和副長就覺得「成日匿喺屋企睇動漫嗰啲」就是「毒男毒女」。
動漫迷掃精品：我唔毒
來動漫節的他們，又認為自己「毒」嗎？升中四的King抱住《不起眼女主角》的攬枕說：「我唔答。（問身旁朋友）你覺得我毒唔毒吖？」他的朋友笑着點頭，King回敬指：「我唔毒！」；陳先生花3、4,000元購買動畫性感女角抱枕等精品，他指不覺得自己毒，但不介意別人指他毒，「只係一種興趣，唔影響正常交際，就唔係問題」。
同樣買了不少動漫精品的趙同學與陳同學則自認毒，「我個人比較沉迷，一開始睇動漫只覺有趣，後來自己都想創作」，他說連自己的興趣都介意人取笑，「咁有咩意義？」其友人陳同學買了抱枕想「裝飾吓房間」，他反問「點解我呢個興趣（喜歡動漫）就係毒呢？」熱愛動漫的香港眾志常委周庭，不認同動漫是「唔正經」，因動漫也有談及社會批判、哲學等。
■記者袁楚雙、佘錦洪
動漫迷解「毒」
香港眾志常委周庭：
「我經常俾人話毒或者宅，我係一啲都唔介意嘅。毒都唔係一個超級負面嘅詞語。」
在職人士陳先生：
「身邊朋友個個都知道我鍾意動漫，但其實只係一種興趣，我覺得唔係一個問題。」
