你有freestyle嗎？現年52歲的劉美君一定有。她性格隨意自在，對人生、工作沒有既定計劃，出碟、開演唱會至愛即興演唱，早年不受社會所限，情色歌曲唱到街知巷聞，一切都是想做就做。教育下一代也與別不同，嚴厲執行家教下，傾向培育自由思想。作為嫲嫲，她絕對新潮，面對3歲孫仔，她才瞬間變回溺愛乖孫的典型嫲嫲。
撰文、造型：林嘉慈
攝影：郭賢興
化妝：Kris Wong
髮型：Gary Sun of Hair Corner
劉美君18歲結婚，經歷過兩段婚姻，有三個子女，未夠50歲就當上嫲嫲，52歲的她將於9月再抱孫。這位新潮嫲嫲教育下一代自有一套，「記得我啲仔女細個時，我係好嚴，嚴係在於唔畀食太多零食，食飯要幾點，呢啲要有規律。我都係，細個屋企要我叫晒所有大人先食飯，家教係應該。」
自由唔代表放任
應緊時緊，應鬆則鬆，劉美君說：「Freedom係我train佢哋有獨立思想，譬如我畀功課佢，suppose佢要諗，冇理由媽咪要幫你諗，冇理由你畫畫，要問媽咪畫乜先好。」傳統及開放兩極並存，她強調：「自由思想唔代表放任。」
成為嫲嫲，讓劉美君有新體會，「細個唔明點解婆婆咁錫我，但我做咗嫲嫲後，就知道點解我俾人縱到咁。因為原來我𠵱家對住佢（孫仔），都會縱到佢咁犀利。」那份不停延續、累積至下一代的愛，成為她最新英文唱片《Reincarnated Love》碟名，「見到孫仔唔係好曳，我會話『算啦！由佢！』我個仔覺得我縱佢個仔。 」
劉美君自認變幻無常，從小欠計劃，家人早已習慣她愛即興的生活模式，「冇人敢plan任何嘢畀我，星期六、日去食飯，問去邊度食，佢哋會話：『你講啦，一陣講咗你又唔鍾意，或者臨尾又話唔好。』所以通常都係我揸主意。」問現任男友對她是否百般遷就？她說：「佢鍾意咪遷就，唔鍾意咪唔遷就囉！」
讚李幸倪演繹好
相隔九年，劉美君10月再開的紅館騷，誓要夠即興，「好興奮，想創造一個好代表到我嘅一個騷。」正如早前錄製英文新碟一樣，「冇預先編曲，大家play by ear，我唱到點，結他就彈到點，我聽到佢彈到點，我又咁唱，呢啲就係jamming，最好玩嘅音樂。」
新碟中用最少樂器、最短時間錄製的《I'll Have to Say I Love You in a Song》，是劉美君的至愛，與新生代靚聲歌手李幸倪合作亦很難忘，「Jam係可遇不可求，搵得佢係因為睇咗佢聖誕有個event唱《Jingle Bells》，我覺得呢個小朋友現場演繹好好，可以係好即興嘅歌手，同我夾，搵咗佢試《Torn Between Two Lovers》，冇夾過，總之叫佢錄音嗰日就嚟啦。」最後錄了五次就收貨。
【凍齡靠運動】
劉美君外形勝過同齡，全靠運動及「揀飲擇食」，不吃加工食品，「如果話我冇食過薯片就呃你啦，但我30歲後就好乖，覺得細個乜都食過。」她會照吃炸雞翼、豬扒，但飲食一定均勻，「食肉仲多過男仔，但會食好多蔬果、乳酪，飲好多水。」
從婆婆身上學習到早睡早起比進補更重要，劉美君說：「最遲10點鐘就瞓，5、6點起身，過往二十年都係咁。一起身就飲兩大杯水，坐陣就飲杯咖啡，再食個蘋果，唞半個鐘就開始做一個鐘運動，8、9點食早餐，一大兜麥皮或乳酪。」準時12時吃午餐，晚餐時間不超過7時，「會應酬好close嘅朋友，但7點後見面嘅話，我只會坐喺度。」
更多精采時尚內容，盡在 http://add.appledaily.com 。