歐洲新球季下月就開鑼，上周六嘅國冠盃美國賽區上演歷來第二次喺西班牙以外舉行嘅西甲國家打吡，巴塞隆拿就向皇家馬德里嚟個下馬威，憑碧基換邊後建功，3:2險勝皇馬，熱身賽三連勝！不過，今場焦點始終係巴塞球星尼馬，盛傳巴黎聖日耳門（PSG）開出1.96億鎊（約19.6億港元）收購佢，部份西媒更話尼馬已經同隊友講咗Goodbye！
巴塞挫皇馬捧盃
除咗皇馬嘅基斯坦奴朗拿度未歸隊，雙方今仗幾乎盡遣強陣出擊，派出「MSN」攻堅嘅巴塞，開波四分鐘就靠美斯禁區內喺三名皇馬守將夾擊下起腳，笠死門將基羅拿華斯；到七分鐘，輪到尼馬左路發難地波傳中，蘇亞雷斯中間一漏，拿傑迪錫遠柱勁射破網。不過，皇馬14分鐘就靠高華錫禁區頂勁射追近比數，36分鐘再由馬高阿辛斯奧引球推進大半場後再同高華錫撞牆後抽入，「銀河艦隊」半場逼和2:2。
換邊後五分鐘，皇馬佈越位失敗，造就碧基建功，為巴塞奠勝3:2，連贏祖雲達斯、曼聯同皇馬，成為國冠盃北美賽區冠軍，更為下月中兩回合西超盃再遇皇馬壯行色！巴塞下仗同查比高恩斯會師甘柏盃；皇馬熱身賽三連敗，周四會友賽美職聯明星隊。
PSG搞定迎新會
巴塞能夠喺季前贏到宿敵固然開心，不過今場隨時係「MSN」最後一次合作，《ESPN》引述消息指，PSG有意「大搞」尼馬加盟發佈會，並已聯絡巴黎警方商討大型活動安排；昔日巴塞隊友丹尼爾喺助PSG捧走法超盃後（見另文），亦落晒嘴頭𠱁尼馬加盟：「勇者敢於作出決定，好似我當年毅然離開巴塞轉投祖雲達斯咁。」西班牙《世界體育報》話，尼馬上周四通知隊友離隊，巴塞隊友亦尊重尼馬嘅決定，只希望佢早日公告天下。最新報道稱，尼馬將會同PSG簽約五年，亦有其他西媒話尼馬禮拜一會收到一筆來自巴塞嘅忠誠獎金，佢只係想收咗錢後至離隊咁解。
群星撐友賽版國家打吡
巴塞賽後返入更衣室變咗「集郵時間」，高球名將「老虎」活士賽後帶埋仔女同佢哋嘅朋友，搵蘇亞雷斯同美斯集郵，偏偏冇咗尼馬。活士仲表示：「多謝你哋同我嘅仔女、仔女嘅最好朋友見面。」NBA球星安東尼（Carmelo Anthony）、祖蒙特格連（Draymond Green）同拳王美韋達今場都有嚟睇波。
