「香港搖滾歌姬」福頭老師曾經講過「熱辣辣熱辣熱辣辣，好熱好熱」，不過就算幾熱，各位打工仔都會為咗薪水，依然着西裝長褲流汗水，但唔知點解每個打工仔都實話自己係最辛苦㗎喇，於是記者就分成男女雙方，喺街頭訪問各位男男女女，畀佢哋慢慢鬥餐死。
有男受訪者表達男士嘅打扮永遠都離不開西裝恤衫，相反女士就可以着背心短裙，明顯舒服得多；而女受訪者就反駁只係外表着少啲，內裏始終都比男士着多一層；更有老一輩突入參戰，聲稱自己每日坐公園日曬雨淋都冇嗌過辛苦，仲鬧班後生唔捱得。唉！爭乜吖！其實大家都咁辛苦！所以請獎門人「打和啦！」
而陳生就提供「睇女」呢個消暑妙計畀大家，但作為正直嘅記者對呢個方法絕對有所保留，大家千祈唔好學呀，咁樣係唔啱㗎！不過最後都奉勸一句，呢排天氣熱，大家記得着少件衫喇……特別係女士。
記者：黎雋宇
2017果籽繼續認真知味。識買惜用。行以求知。好事多為。重修舊好。
緊貼果籽報道，即like： http://fb.me/AS.AppleDaily