港台王牌節目《城市論壇》做埋噚日唞暑一個月，大家都好關心節目9月重來時會唔會有新人事、新作風？皆因噚日呢集可能係主持人蘇敬恆（蘇B）嘅告別作，盛傳佢會喺呢個炎炎夏日跳入「熱廚房」，任食物及衞生局局長嘅政治助理。唔少論壇常客節目開始前議論紛紛係咪會有新主持，有人趁台下發言時段恭喜蘇B「升官發財」，蘇B只係回頭一笑，冇任何回應，搞到唔少粉絲心癢癢。
節目完咗，向來多數訪問人嘅蘇B呢次變咗受訪者，佢亦大方接受訪問，但對於新動向繼續冇正面回應，只係話今集係呢季《城市論壇》最後一集，相信9月時仍會有好多題目要傾，「我知道大家好關心我嘅去向，多謝傳媒朋友嘅關心，我希望大家繼續支持《城市論壇》，繼續支持香港電台，繼續公營廣播」。
據聞已向港台遞信
蘇B自言喺2015年9月接手主持工作，其間又要準備立法會選舉論壇，兩年來幾乎冇休息，所以嚟緊會唞吓，會同父母去旅行，大約一個月後就返工。返工？喺廣播道定係添馬艦返工先？嗱嗱嗱，一日未公佈、一日都係保密嘅，蘇B可能有口難言，重複一句：「多謝大家關心。」
盛傳食衞局局長陳肇始喺幾星期前搵蘇B入「熱廚房」，據聞佢已經正式向港台辭職，蘇B笑稱：「我仲係港台員工。」咁噚日嚟講呢句肯定係冇錯嘅。本身都係傳媒出身、噚日成為受訪者，蘇B都話有啲唔慣，但就話明白大家工作係需要，總之適當時候會分享更多。
李八方
