由旅發局舉辦嘅電競音樂節8月4至6日喺紅磡香港體育館舉行，會有電競比賽、韓國歌手同組合嘅演唱會、嘉年華等。其中電競比賽採用熱爆嘅遊戲《英雄聯盟》（League of Legends），唔同賽區仲會有剛退役嘅世界級選手應邀參加。
查實香港有唔少年輕人係電競好手，例如就讀於香港專業教育學院（IVE）嘅陳永耀同李沛明，佢哋係「九龍電競隊」成員，去年夥拍3名同學出戰「英雄聯盟國際大學冠軍賽」奪冠，揚威國際，其後獲邀組成職業電競隊。
李沛明接受政府新聞網訪問時話呀，父母起初都反對佢打機，覺得對身體唔好兼好「頹廢」，但佢獲獎之後開始肯定同支持，後嚟得悉知名電競選手有可觀收入，放心畀佢繼續。陳就話比賽獲勝帶來成就感，令佢立志成為職業選手，認為香港有發展電競嘅極大潛力㖭。