鷹君（041）家族爭產風波鬧得如火如荼，上星期有朋友建議去銅鑼灣富豪金殿食晏，一心諗住睇下有冇機會巧遇羅老太或其他羅家成員，點知一個都見唔到，不過呢度嘅齋菜確係有新鮮感，Green Monday可以考慮下。
唔少齋菜館喜以豆類炮製「肉類」，呢度有兩道分別係「檳城椰香咖喱植物魚塊（Fishless Fillet）」（168元）、「欖豉脆脆植物雞（Gardein Chicken）」（168元），「魚肉」、「雞肉」嘅質感一流，後者直情係形神俱似麥樂雞㖭呀，幾過癮。
由於佢口感堅似麥樂雞，但又知道佢只係素菜，所以唔覺唔覺就食咗幾件落口，加埋其他餸菜，茹素肯定唔可以減肥囉。聽講富豪太子女羅寶文茹素多年，點解佢可以keep得咁好！？