有不少人話讀會計學好悶，做會計師尤其是核數師仲更加悶。讀完會計，如果唔考CPA牌，簡直係浪費時間，如要轉行，都要考咗牌先，日後可能有用。肥仔K有位中學同學十幾年前考高考之後，特別問左丁山：「我想一畢業就搵到工，讀邊科好？」左丁山不假思索答：「會計系！」後來佢果然入咗科技大學商學院會計系，一畢業就俾一間「碧科」睇中，七月就上班去也，左丁山叫佢俾啲耐心，捱三至四年考完牌，做咗經理先至考慮轉工，點知唔夠一年，佢就話做核數係非人生活，工時太長，辭工去也？去咗邊，做警察幫辦。
始終未考到牌就轉行，係一種損失。吳嵩就聰明嘞，在澳洲讀完會計系，再讀MBA，入咗「碧科」，考到澳洲CPA，有少許經驗之後就在雪梨開會計師行，但最後聽左丁山之言，25年前為追求興趣，放棄會計師生涯，返嚟香港寫馬講馬，追求人生之最大興趣，卒之名利雙收，成日飛來飛去睇勻全世界最盛大嘅賽馬如杜拜世界盃、墨爾本盃、皇家雅士葛、凱旋門大賽等等，羨煞馬迷。
人生未必係直路賽事，總會轉彎抹角，柳暗花明又一村，事在人為嘅啫，最緊要有勤力，有耐性，不放棄嘅奮鬥精神，在大學讀甚麼系往往殊途同歸。四年前，肥仔K俾一位同學叫去輔導一位DSE炒晒嘅學生A。學生A肥晒佬，六神無主，父親搵升學輔導公司（agent）問路，agent竟然教學生A去某間美國大學讀一年班，或者去英國讀中學。考DSE肥晒，仲可以去美國讀大學？升學agent真係夠膽噏得出就噏，肥仔K對學生A講：「簡直係浪費學費，浪費時間，不如專心惡補，考TOFEL，到加州Foothill，勤力讀書，兩年後再講。」轉眼四年，肥仔K差不多已經唔記得件事，點知同學打電話嚟：「喂，我表弟學生A學成歸來，出嚟見吓面。」吓，學成歸來？問清楚先。原來學生A聽肥仔K之言，真係入咗Foothill，發憤苦讀，兩年後接駁升上加州大學聖地牙哥分校（名校也），主修經濟，今年畢業回港了！這真正是天無絕人之路，讀書有Take Two，美國社區學院有其優越性，香港學生去到加州矽谷嘅Foothill（唔駛經agent代辦嘅），最緊要靠自己，唔好加入啲東南亞富二代富三代學生嘅玩樂派對或與香港學生玩到癲！聽講近年香港有好多學生去Foothill，有數百之眾，在異地搵到同聲同氣嘅朋友，有利有弊，想讀書成績好，就要保持清醒！