講起周凱旋，又點可以唔講埋超人呢？「超人」李嘉誠旗下長和（001）、長實（1113）本周四公佈業績，上市公司公佈業績前通常靜英英，長和系今期就好多noise喎。
嗱，先係6月傳出超人有意明年退休；跟住電能實業（006）畀個surprise股東，二度豪派特別股；然後長實地產話唔止做地產，所以要改名做長實；再近期啲，長建剛落實拍住長實以414億投資德國能源商ista；噚日和電香港（215）順手百幾億賣走固網業務。
超人喺業績前交咁多功課，又涉及系內咁多間上市公司，是咪應該重開中期業績會，畀財記問個明白，又畀咁多間上市公司嘅小股東知多少少呢？需知道近年超人取消咗中期業績會，只得分析員會議，資訊好似唔夠公開透明喎。可惜，超人暫時都唔打算見人，希望佢會改變主意喇。