今日係林鄭班子滿月日，司局長過去一個月可謂冇時停，落區做騷、訪貧問苦唔在講，每遇城中大事，全部都要落水。過去一個月先有中學文憑試放榜，司局長要返母校同師弟妹打氣，後有逼到癲嘅書展，問責局長排住隊落去，唔睇都要埋去揀吓、打咗卡先走人。
林鄭噚日更喺電台講明，凡親香港有「盛事」，都要有司局長嘅身影，認為咁樣先可以拉近同市民距離，與民同樂。佢話單係一兩個司局長做係唔夠，要成班司局長一齊做，先能顯示出關心，同時提及凡涉及年輕人嘅工作，無論同司局長本身負責嘅範疇有冇關，都要展示關心！
自稱No.1 有假唔放
唔係盛事又點？司局長一樣要關注，君不見林鄭月中突然到訪伊利沙伯醫院視察醫院應付流感嘅情況後，食衞局長陳肇始成為流感專員，兩星期足足見咗8次傳媒，平均唔夠兩日就出嚟回應，仲要探訪埋屯門、聯合醫院。林鄭出聲，局長出巡，相信類同情況陸續有嚟！
林鄭噚日仲喺電台節目形容自己係特區「No.1」，處事係用個人承擔嘅作風，即係決定咗要做嘅就要去做，如果效果唔好，佢會負責，「𠵱家我嘅工作時間好長，我噚日（周六）都做咗10幾個鐘，因為我做咗決定，能夠推行嘅把握比以前大好多，因為我有個團隊」。
花生友聽聞林鄭曾經喺內部會議同班子談及放假問題，明言自己唔會放暑假，但司局長若攞咗假嘅可以繼續放。大老闆有假都唔放，試問馬仔又點敢放？可想而知當場有幾多司局長滴汗，唔知快將跳入熱廚房嘅副局政助ready有假未必有得放未？花生友都趁暑假唞一唞，10月再蒲頭！
花生友