保險界前輩P請左丁山到福臨門食飯，嘆息好多人進入保險行業，個個爭住做前線經紀代理，唔願做後勤工作，實則上並非好多人適合做前線嘅，把口唔得，面皮唔夠厚，性格害羞之人，一定做唔成，反而後勤專業工作有好多職位冇人吼，正是有工冇人做。
因是之故，前輩P幾經努力，聯同保險業人士幫忙，說服咗恒生管理學院（或者係一拍即合，因恒管係一間講求實在實用學位課程嘅學院），今年九月開辦保險學學位課程，前輩P亦會親自出馬，抽空教埋一份，以盡提攜後輩之責。佢話保險業係佢衣食父母，要常懷感恩之情，事實上香港好有條件成為亞洲保險業中心，只要人才足夠就得嘞，未來一帶一路真係發展起來的話，各種非人壽保險生意會大到不得了，香港不能錯失機會，拱手讓給新加坡。
中大港大都有精算課程，培養精算師，但保險學就似係恒生管理學院首創，今年DSE學生不妨考慮。
會計師T又同左丁山講，叫學生選讀會計啦，呢行需要接班人㗎，左丁山話：「會計學唔駛宣傳喇啩！雖非狀元學科，已係尖子天堂咯喎。」會計T話：「最近不少人講呢行工作時間長，好似係非人生活，嚇怕人，我驚有啲中學生唔敢報讀會計系噃。」報紙係咁講啫，實際上會計系學生最易搵工，會計師公會做咗一個調查（2016年12月），香港會計師有60%年齡在45歲以下，幾年輕，有65%在企業工作，25%在會計師樓，其他在政府、NGO等等。講到薪酬，有49%會計師賺年薪超過60萬港元，當然係中產啦，另外41%年薪介乎30萬至40萬之間，新入行嘅（10%）亦有年薪30萬元以下，以香港薪酬水平而論，係屬於高薪一族，以左丁山所見所認識嘅，不少會計師泊在馬會停車場嘅車，係法拉利保時捷大Benz㗎！薪水不錯嘞，工作時間又如何？會計師公會調查發現，53%每周工作50小時或以上，41%工作40-49小時以下，其中工時較長嘅，2%工作90小時或以上，最辛苦嘅係每年一至三月審計核數旺季之時。睇數字，工時唔算認真長，以每周工作五天計，26%會計師返工40至60小時，即每日8至12小時。左丁山四十年前初入銀行，已經慣咗朝八晚六，或朝八晚七，從未試過五點鐘放工嘅。會計師公會有會員40462人，今年學生（考試中）會員有18000人左右，可見會計師仍然係年青學生嚮往嘅行業。