林鄭新班子嘅副局長同政治助理名單，盛傳極有可能下周二出爐，名單上唔少人名已經曝光，最具爭議嘅當然係連林鄭都開腔力撐嘅教聯會副會長蔡若蓮，背景極紅嘅佢料喺教育局做副局長推國教，但令坊間更關注嘅，係盛傳兩位80後大台出身男記者步薯片叔政治助理羅永聰後塵，放低咪同筆走入熱廚房做政治助理，負責炮製政制同食衞局撚手小菜。
聶德權親自揀選
成日同大家「講清講楚」嘅無綫首席記者吳璟儁，盛傳即將告別無綫大台跳入添馬艦，喺政制及內地事務局任政治助理，唔知佢之後解說政策時，講得清唔清楚？但據知1984年出生、現年33歲嘅佢係獲政制及內地事務局局長聶德權親自點兵，誠邀加入團隊，咁啱得咁蹺，佢同盛傳會離開公務員行列做副局長嘅現任運輸及房屋局副秘書長陳帥夫，都係新界鄉議局元朗區中學舊生，更多一份師兄弟嘅關係。
2006年加入無綫新聞嘅璟儁中大政治與行政學系畢業後，2010年喺英國布里斯托大學獲國際發展學碩士學位，行家噚日問新聞王子去向，佢回覆：「尚未辭職，工作如常，多謝關心」，似乎喺打官腔呢方面表現唔錯。由於名單上嘅副局同政助唔係即刻上任，外界對佢呢個答案亦毋須意外。
至於另一個喺政助名單嘅男記者，係現為港台節目《城市論壇》主持、人稱蘇B嘅蘇敬恆，盛傳會出任食物及衞生局局長政助；無獨有偶，佢都喺無綫電視做過記者。1981年出生嘅蘇B係男拔萃舊生，係港大社會科學系學士、中大新聞學文學碩士，曾俾劉慧卿喺節目中稱呼「儍仔」，卿姐事後稱「儍仔」係佢口頭禪，但都向蘇B致歉。
成日儍笑嘅蘇B高大靚仔，網上有唔少女粉絲，值得注意嘅係呢位港台男神至今未婚。蘇B回覆八方時指唔評論傳聞，但多謝大家關心，呼籲大家繼續收睇周日續由佢主持嘅《城巿論壇》，並繼續支持港台節目。咁又係，一日未離開港台，一日仲係港台人嚟嘅，況且嗰個係暑假休息前最後一次城壇，之後主持仲係咪蘇B？大家估吓。
李八方