《警訊》都有教，千祈唔好畀賊人有機可乘！今年初仲効力緊車路士嘅後衞泰利似乎就冇乜防盜意識，佢年初喺有340萬followers嘅ig公告天下，話自己舉家旅行幾日，結果賊人就乘機幫襯佢屋企，泰利一家總共損失咗40萬鎊（約400萬港元）財物，案件目前仲查緊，而失竊物品嘅清單亦都曝光（見附表），當中除咗珠寶首飾之外，仲有超過20個手袋銀包同埋簽咗名嘅《哈利波特》書，陰公豬囉！
去瑞士滑雪po開心片段
今個夏天轉會阿士東維拉繼續做隊長嘅泰利，二月同太太東妮同埋小朋友一齊去度假，由於泰利喺自己有成340萬人follow嘅ig，出post話畀大家知佢哋一家人去瑞士玩幾日，又post晒好開心嘅滑雪片段，所以佢間豪宅自然就係空城一座。
老婆手袋多到偷唔晒
結果，賊仔趁泰利度假期間，爆竊佢間價值500萬鎊（約5,000萬港元）嘅豪宅，損失40萬鎊財物中，傷得最重係價值219,000鎊（約220萬港元）嘅卡地亞珠寶，當中包括有61,000鎊（約61萬港元）嘅戒指，另外仲有18,000鎊（約18萬港元）嘅初版簽名《哈利波特》小說、泰利嘅幾隻名錶同埋廿幾卅個手袋銀包等等。據報道，泰利屋企嘅名牌手袋多到啲賊想拎都拎唔晒，而失竊咗物品全部都搵唔番。
人怕出名豬怕肥，睇嚟其他英超球星都要注意吓家居防盜，或者去旅行要低調啲嘞！
