【本報訊】坊間流傳清甲醛方法多多，理工大學屋宇設備工程學系副教授梅國威認為，植物效能成疑，只要讓單位保持通風，普遍兩至三星期可讓甲醛於空氣中稀釋。
梅教授指人們常談及光觸媒，假設牆上髹上含甲醛油漆，使用藥水阻止甲醛揮發或透過化學作用把它分解，理論是對，「但單位兩三個禮拜後，甲醛會自然稀釋，整來做乜！」另一情況是傢俬含甲醛，噴藥水後櫃子關閉，沒接觸陽光，難分解甲醛。
「植物要大量先吸到」
他稱：「傢俬表面有甲醛，以藥水分解係work，問題係該用料不會自然添加，好似汽車打蠟，打完一次，個蠟係咪呢世係度先？我嘅理論係究竟傢俬係咪經常釋放甲醛先？噴完，解決咗一次，心安理得，當畀錢見心理醫生，安心啲。我唔可以扼殺光觸媒嘅作用，但要懂得使用。」他指最重要是知道甲醛的來源，「裝修前盡量避免使用含甲醛傢俬」。
至於植物包括吊蘭、虎尾蘭、蘆薈能否清除甲醛，他回應：「科學上的確吸甲醛，問題係一棵吸得幾多呢？需要一定數量先吸到。理論上係做到，但唔可以用work呢個字，只能夠講有此特點，但你放幾多棵先，正如唔能夠用一個鬚刨仔size吸塵機去吸全屋啲野，唔make sense。」