七月二十一日本欄講大學選科，有老友睇完，批評左丁山市儈，認為讀大學應該追求理想夢想，不應該一開始就諗住畢業便搵銀，令大學教育變成職業教育，佢話：「譬如你哋新亞書院，成日講新亞精神，新亞精神唔係搵銀精神啫！」
老友係啱嘅：新亞書院創辦之時，由文史哲大師主導，新亞精神係源於中國文史哲，講求儒墨道。偏偏少講（根本唔講㖭）商鞅法家，學陶傑話齋，咪唔夠現實囉，所以新亞校歌有得你唱：「手空空，無一物」，學校唔識搵銀，捱窮數十年也。
現今拜金主義盛行，讀大學唔講搵銀科目，又會俾人批評堅離地嘅啫，左丁山講馬雲讀英文系，咪又俾另外一位朋友批評：「你唱高調啫，搵個萬中無一嘅人物嚟做例子，容易誤導細路！」
哎吔，讀一啲畢業後唔易搵到工嘅學科，對基層子弟來講，確係堅離地，7月19日華爾街日報有專文報道南韓大學生畢業後搵工艱難，大財閥（如三星、現代）公司請人，一百個選三個，中小企請人，一百個請十七個，競爭之激烈，香港學生見到怕會嚇死。南韓於1980年代經濟高速增長，每年GDP增長平均有8.6%，大學生容易有工做，但現時經濟體積大兼漸趨成熟，2016年GDP增長只有2.8%，於是百幾個大學生爭幾個飯碗，今年就有一萬七千個大學生延遲一年先至畢業，以免雙失。
今年六月，南韓失業率係3.8%，有一百萬人失業，其中一半係介乎15至29歲之間，年青人失業率在六月份升至10.6%，比全國失業率高出近2.8倍，可知畢業生就業艱難，好難怪大學選科時要「市儈」一啲，特別係對基層學生而言。
文史哲科學地理學新聞學呢啲科目，又真係搵工冇讀會計財務咁易嘅，通常文學院畢業生（做香港教師除外）嘅平均薪金都係低啲嘅嘞，最近統計數字講自資院校之中，東華學院畢業生薪水平均兩萬，比其他自資院校高好多，點解呀？東華學院有護理課程吖嘛，畢業就有醫院請，自不然爽神啦。
講到自資院校，一位保險界前輩特別話俾左丁山聽，恒生管理學院下學年開設新學士課程：主修保險學，不是培養保險經紀，而係保險後勤人才如理賠師、核保師等等，學額約有三四十名。
呢位前輩話：「我敢寫包單，讀完恒管保險學學士課程，未畢業就有保險公司請。」