面對香港土地不足，有港大學者建議喺船灣淡水湖填海建屋，天文台前台長、中大地理與資源管理學系客座教授林超英表明唔贊成，更形容係一個「噩夢」，因為水嘅重要性高於一切，即使有屋冇水都冇用。
黑英噚日喺電台節目話，尊重各界設法解決住屋問題，但唔贊成填咗船灣淡水湖，除咗水係好重要，亦因本港水庫其中一個功用係承載到來嘅東江水，容許當水源上游發生問題時，香港仲有時間處理，因為東江水來港後唔會即時進入本港供水系統，而係先暫存於淡水湖。
佢亦提及香港一旦出現旱災，本地唔可以完全依靠中國供水，需要淡水湖提供食水緩衝。
雖然淡水湖生態價值較低，但黑英話仍有康樂價值，覺得香港北面有好多平原地，各界可以諗辦法喺呢啲地方建屋，而唔係打淡水湖或郊野公園嘅主意。