雖然係暑假，但唔少高官都冇得放假，因為特首林鄭月娥下令要落區同市民全接觸嘛，試問邊個夠膽hea？好似落力寫網誌嘅發展局局長黃偉綸（Michael），噚日亦到訪深水埗區家訪，向獨居長者大送禮物包，同時都要同區議員會面聽意見。
嗱，林鄭上任之初已落令，問責官員要走勻18區，仲要求同18區區議員傾偈至少近個半鐘。不過，呢方面真係難唔到Michael，曾經係辯論隊成員嘅佢，一向滔滔不絕，唔講嘢可能仲難過要佢講嘢，據聞最終傾咗超過個半鐘，超標完成任務。
Michael噚日亦參觀咗饒宗頤文化館，了解呢座三級歷史建築嘅保育、活化同營運情況。至於研究香港未來土地供應來源嘅專家小組，佢透露正積極籌組，預料9月底前召開首次會議。