乜嘢叫做有求必應？政府公佈一地兩檢當日，政務司司長張建宗去信立法會，希望立法會即使放緊暑假都加開會議，討論一地兩檢，內會主席李慧琼即時撲出嚟話樂意配合，快到下周四就開會，呢啲莫非就係「高鐵速度」？故事未完，香港本土議員毛孟靜喺一地兩檢公佈嘅同一日，要求立法會主席梁君彥召開特別會議，點知主席一口拒絕。
毛姨姨認為，一地兩檢涉及眾多重大憲制同法律上尚未釐清嘅疑慮，影響《基本法》同一國兩制，內地人員甚至會喺西九車站內荷槍實彈，令人擔心人身自由等問題，所以需要開會討論，但梁君彥卻拒絕開會，噚日回覆毛姨姨時話立法會有其他合適平台討論此事，加上立法會內會將召開特別會議喎。
官員一聲令下，立法會就火速開會配合，反而議員提出開會就被拒絕，可算香港政圈一大奇景咯！