曼聯同季尾未獲續約嘅射手伊巴謙莫域繼續藕斷絲連，雖然佢仲養緊傷，但英媒一路吹話領隊摩連奴對佢念念不忘，而周三喺不敵巴塞隆拿0:1場國冠盃、經歷今夏熱身賽首次冇波入後，摩佬就作出更大嘅暗示，擺明想簽番呢位35歲瑞典老將。
繼隊中法國球星保羅普巴日前話伊巴仍然係曼聯領袖，被解讀為暗示對方會再入「魔」後，早前曾承認再簽伊巴唔係冇可能嘅摩連奴，喺講到紅魔今夏以7,500萬鎊簽入盧卡古嘅時候就咁講：「我哋使好多錢買一個前鋒，因為要買前鋒，你一係使錢，唔係就買唔到。我哋係因為發生喺伊巴身上嘅事，所以先要使錢買前鋒；我哋唔容許喺新球季頭六個月內都冇一個好勁嘅前鋒。」
國冠盃0:1負巴塞
言下之意，似乎就係因為伊巴傷咗先要買盧卡古，即係後者查實就好似代替品咁，暗示過咗頭六個月後，伊巴呢位佢心目中嘅「正室」就會返嚟擔正。其實，伊巴回歸嘅機會真係唔低，曼聯想慳番筆人工先唔同佢簽約，但留一個舒適嘅環境等佢喺度養傷，好番後再睇吓隊波成績或者盧卡古踢成點，先決定簽唔簽番佢。伊巴上季入咗成28球，唔係四月喺對安德列治場歐霸盃整傷右膝十字韌帶，肯定過30粒，加上佢經驗咁豐富，睇落起碼可靠過盧卡古。
講番曼聯周三對巴塞場波，正選嘅「新魔獸」似乎冇乜料到，外媒仲插佢等波到，話佢應該主動爭取機會，仲未可以喺大賽證明自己，結果曼聯亦結束咗今夏熱身賽四連勝走勢。至於幫對手巴塞入波嘅又係尼馬，佢近兩場加埋入咗三球，睇嚟轉會傳聞反而令佢更落力，但唔知係咪想show料等巴黎聖日耳門睇吓自己有幾堅，希望可以抬高身價呢？另外，尼馬賽前喺球員通道同摩佬攬頭攬頸，搞到唔少網民有反應，但摩佬就叫外界咪亂諗。