動漫電玩節又來了，今年展覽又有甚麼必玩必睇的重點呢？其中一項要試就是剛在美國發佈的4K遊戲主機Xbox One X！Xbox One X雖然會在11月開始推出，但香港方面就未知幾時有得賣，但今次就運來Xbox One X主機展出，而且亦帶來Xbox One X賽車遊戲《Forza Motorsport 7》，參觀者都有機會坐在超靚駕駛座上睇住超大畫面試玩這款4K賽車遊戲。雖然今次只是用上Xbox One X開發者版本主機試玩，不過畫面細緻程度及畫面流暢度真是比以往賽車遊戲精細好多，雖然美國來的工作人員就話現場所試玩的遊戲版本仍未是最終版本，但小記已經好滿意。除《Forza Motorsport 7》之外，現場亦可試玩到多款未推出的Xbox One遊戲如《Crackdown 3》、《Super Lucky's Tale》及《Dragon Ball Fighter Z》，有興趣的玩家都可以一試；至於現場所提供的買機優惠，全部都是Xbox One S套裝，吸引力似乎就不太大。
另一邊廂PlayStation主打就是PS VR，現場提供多個試玩台可試玩到多款未曾推出的PS VR遊戲，但大家試玩驚嚇遊戲《The Inpatient》時記得要有心理準備，因為真係好得人驚。PlayStation展覽內亦特別安排了兩個駕駛座供玩家試玩10月推出的《Gran Turismo Sport》，最特別是現場亦可戴上PS VR頭盔玩到VR Demo版本，駕駛經典都幾像真。之前PlayStation已公佈即場買PS4 Pro主機及PS VR會有優惠，到臨開幕前更將優惠升級，如購買PS4 Pro主機即減多$100，再可獲贈$150禮物券、DualShock 4手掣及多1年保用服務；至於買PS VR就送$100購物券及PS Move動態控制器兩支，想買機的朋友記住入場掃貨！
LEGO在今年動漫節上亦繼續大賣香港情懷，今年LEGO以「Build Amazing Hong Kong」為主題請來17位香港LEGO達人，發揮無窮想像力，砌出6個未曾發生的香港大型盛事！6件LEGO展品都結合香港地標及令人意想不到的活動，例如大家應無想過可以在銅鑼灣街頭玩Mario Kart（《銅鑼灣鬼馬賽車嘉年華》），又應沒有想過在油麻地果欄玩唧車比賽（《果欄唧車比併大賽》），而最特別是算是在大球場上空玩近似Iron Man及哈利波特魁地奇的空中足球賽（《飛天足球大賽》），LEGO迷記得影多幾張相！另外LEGO攤位內亦可搶先買到一系列旋風忍者LEGO產品，以及LEGO Creator Expert – 10258 London Bus及LEGO Technic – 42070 6x6 All Terrain Tow Truck。
至於Hot Toys展區方面，最震撼當然是參照今年Marvel重頭作《雷神奇俠3：諸神黃昏》電影宣傳片中，雷神跟變形俠醫在羅馬競技場展開對決一幕的1:1原大情景雕像，今次更是全球首次展出，Marvel迷自然要入場打卡呃下Like啦！另外剛在上星期美國聖地牙哥動漫節展出的《正義聯盟》最新造型珍藏人偶如Batman、Batman（Tactical Batsuit）、Superman等等都有運來香港動漫電玩節展出，甚至連在聖地牙哥仍未造好的The Flash閃電俠頭雕都有得睇。
香港動漫電玩節2017
展期：2017年7月28日至8月1日
時間：10:00至21:00（8月1日至20:00）
地點：香港會議展覽中心Hall 1及Hall
入場費用：$35
記者：布偉倫
攝影：張志孟
2017果籽繼續認真知味。識買惜用。行以求知。好事多為。重修舊好。
緊貼果籽報道，即like： http://fb.me/AS.AppleDaily