保監局上月成立前，主席鄭慕智（Moses）一直好努力物色能人擔任總裁（CEO）一職，可惜事與願違，全部睇唔啱，近排仲喺網站張貼招聘通告，搵咗專請CEO或董事級嘅國際獵頭公司DHR幫手。
睇番張招聘通告，其實好簡單介紹保監局背景，又講下做保監CEO應該要擔當咩角色咁，至於有乜要求，不外乎要喺金融服務業界年資超過20年，有統領大機構經驗，仲要對本地保險監管架構、市場發展潛力有認識。
不過張通告就似乎未有提及重點，就係Moses要求保監CEO需要了解國情，原因係兩地保險市場嚟緊有好多合作，如果請老外同中保監溝通，文化背景唔一致，就可能有啲雞同鴨講。
通告另一個亮點，就係話保監CEO嘅報酬具競爭力（competitive），但同之前Moses講嘅就有啲唔同，因為Moses話，保監局對比保險公司，報酬可能無咁高，仲呼籲有志之士要犧牲吓咁話。
目前保監CEO係由政府借調過嚟、前保險業監理專員梁志仁頂硬上一年，希望Moses快啲請到人喇。