意大利廚櫃品牌Dada喺中環開設旗艦店，佔地近5,000方呎，噚日開張，有多間友好發展商高層撐場，包括永義太子女官可欣、龍光地產林力山、崇傑地產伍尚宗、伍尚修等，新世界發展（017）主席鄭家純亦有送花牌到賀。
過去主攻豪宅新盤市場嘅Dada，同多間發展商有合作，出品廚櫃屬於何文田天鑄、沙田九肚山峰等樓盤嘅交樓標準。公司甚至曾經為九龍塘某洋房項目專門訂造一套價值高達500萬元嘅廚櫃，由Giorgio Armani專親自設計，都幾誇張。
Dada（香港）董事總經理胡鎮宇就話，公司產品喺新盤已經有穩定銷售，營業額近億元，今次開舖係希望開拓零售市場咁話。