唔經唔覺，保險界立法會議員陳健波喺兩屆政府都做過財委會主席，做得好唔好呢？真係見仁見智，但如果問佢有冇興趣繼續做，佢就耍手擰頭話已經表達咗唔想再做，但為咗大局，預料佢都會繼續攞條命仔嚟博。使唔使咁誇張？佢自爆為咗主持會議，要食定雙倍份量嘅降血壓藥，似乎好大壓力喎！
波哥噚日主要財委會嘅年結記招，照舊交代吓開咗幾次、處理幾多項目，同埋鬧咗一大輪拉布之後，就被問到仲會唔會連任財委會主席呢？佢斬釘截鐵話，已經表達咗唔想再做嘅意願㗎嘞，然後又呻喎，做財委會主席「死好多心血」㗎，好似今個月19號、本年度最後一次會咁，為咗呢次會，佢事前要食定雙倍血壓藥。
稱太平盛世先交個位出嚟
呢個會發生乜事？因為要配合林鄭新班子，以歷史性速度通過36億元教育新資源撥款，做主持嘅波哥黨然不容有失，工黨張超雄則因為站立發言聲援被DQ議員而被逐㖭！
但波哥呢頭講到好唔想做落去咁，但嗰頭又話如果正值危急關頭、所謂「打大仗」嘅期間，佢都冇理由走咗去嘅，所以願意當仁不讓，等到太平盛世先至交番個位出嚟。原來為咗大局，波哥係願意自我犧牲！
至於財委會副主席田北辰，前排已經有傳建制派唔妥佢自立門戶，標榜自己係獨立建制，加上迪士尼撥款上又撐得太行，打算搣佢柴。
二少噚日講得好可圈可點，佢話「人生最緊要豐盛」，關鍵在於永遠有新嘢學，而呢年做副主席睇住波哥，學咗好多嘢，希望波哥連太平盛世都唔好退落嚟，而佢有冇得再做副主席……就視乎有冇人支持喎。
李八方