西班牙《馬卡報》驚傳「銀河艦隊」皇家馬德里以破世界紀錄轉會費1.6億鎊（約16億港元）由法甲摩納哥收購18歲前鋒基利安麥巴比，雖然「新亨利」今夏轉會傳聞滿天飛，但皇馬近年轉會作風轉趨低調，今季主要收購只有法國年輕左閘迪奧靴南迪斯同U21歐國盃MVP丹尼施巴路斯，加上回收馬高斯洛蘭迪、捷西斯華利祖等，突然爆單驚世「大deal」確實令人詫異。
其實如果你捉到以下呢串數字有咩玄機，就會知道發生咩事：2000、2004、2009、2013、2017…叮咚叮咚，就係皇馬會長佩雷斯嘅選舉年！雖然佩雷斯連同今年在內已經連續兩屆喺冇對手競爭下當選，但無獨有偶，喺過去4個選舉年，佩雷斯當選後都會有星級球員加盟「贈興」：2000年由死敵巴塞隆拿挖走費高、2004年簽入利物浦前鋒奧雲；2009年將基斯坦奴朗拿度帶到巴拿比奴，2013年就從熱刺收購加里夫巴利…唔通今年就搵「新亨利」放煙花？難得係上述幾位球星都唔算係「大白象」，呢啲政治手腕，香港高官學吓嘢啦！
不過，佩雷斯呢單功績搞唔搞得成，仲要問過曼城先，因為據英國《每日郵報》報道，曼城願意匹配1.6億鎊轉會費加入麥巴比爭奪戰，尤其是「藍月」今夏已經斥資近一億鎊羅致摩納哥孖寶班捷文文迪同貝拿度施華，摩納哥對住呢個「VIP」，就算唔打折扣都做個順水人情吖。