今年二月四日立春之日本欄寫立春八字：指立春係丁酉年壬寅月壬戌日庚子時，八卦丘指壬水乃江河之水，陽水，有奔蕩之性，四柱之內有三水二金一木一火一土，庚金生水，所以今年會水旺，防水災多過防火災。八卦丘之其他預測，準唔準，到年尾先至可以下定論，但預測到今年水多，防水災多過防火災，到目前為止，又唔錯得晒喎，今年入夏之後，雨水特多，六月份雨量破紀錄，七月份雨量相信唔會少，例如7月17日至18日連續兩日，好似48小時下雨無間斷，新界東仲達到黑雨級數，令大尾督山洪沖入村落，鄉村成澤國。
外地呢，華南一帶，暴雨成災，由湖南至廣西，六七月不停降暴雨，去到日本九州，及中國四川，更有山泥傾瀉，道路斷絕，連美國沙漠地帶阿里桑拿州都有暴雨，令山洪20秒內沖入水潭，捲走十幾人，九人死亡；印度古吉拉特邦暴雨24小時，7人喪生。現在睇咗一啲大雨成災嘅事實根據，回頭再參詳立春八字，可以確認今年雞年水旺，戌土內雖藏戊土，氣勢較為薄弱，不足以防水，現時夏天本應火旺，竟然不旺，到了冬天水旺之時，恐怕更加大雨連綿不絕，街頭店舖及戶外活動會望天打卦，大受影響。
點解今個夏天會常常下雨，總有科學原因，要問天文台，不過天文台五月時曾預測過：夏季雨量正常至偏少！肥仔K居然醒起，習近平訪港之三天，香港陽光普照，天空一片蔚藍，佢一走咗啫，天雨就嚟嘞，中間有乜原因，會咁啱嘅？係唔係有人在深圳放高射炮射天空，趕走雨雲，務求領導人活動不受大雨影響呀？中國辦奧運之時，曾有放高射炮射天空之說，足證中國科學昌明，其他國家學唔到，或者識做而唔想做，洋人照顧國家領袖之道，總係粗疏啲，唔似得中國幾千年來體貼呵護皇帝咁細緻嘅！寫呢篇稿之前，本想出門去灣仔六國酒店參加酒會，點知吃午飯之時無雨，四時左右就有黃雨警告，穿西裝出門一定濕身，想話着件風褸，似乎不成體統，呢個時候，中環塞車到暈，的士當然搶唔到嘅嘞，唯有搭地鐵再由修頓行去六國，諗起就皺晒眉頭，故此話大雨每每降低出街消費意欲，打擊街頭店舖生意，拖慢GDP增長速度。逢有大雨就明白，點解街舖減租之時，大商場還是要加租趕客，好似𠵱家咁，假如酒會在地鐵站之上嘅太古廣場舉行，坐地鐵唔駛濕身就到，你話啲酒店幾有競爭優勢呢！