嚟到英國新市場國家賽馬博物館，可以一試做騎師策馬奔馳嘅感覺，就係騎電動機械馬。
06年落選港姐，曾拍過電影《奪命金》飾演「黑仔」姜皓文俏秘書的黃瑩阿Joyce，同埋《蘋果》記者阿軒一齊到博物館，黃瑩及騎師楊明綸女友莎拉，均有試騎電動機械馬。
想成為騎師，當然要經過體能測試及一連串專業訓練，本港見習騎師不時騎木馬練習，但現今科技進步，輕易製造出一台接近1比1嘅電動機械馬，無論身形大小，步頻速度都幾乎一樣，最難得係博物館有專業教練教授大家點樣騎呢匹電馬。
睇得越洋賽事多，大家都會認得幾件名牌綵衣，臨上電馬之前，有幾款綵衣比大家選擇，黃瑩便穿上「范高爾」綵衣，而莎拉更穿上英女皇專用綵衣騎電動機械馬。從旁指導嘅教練，會先講解點樣控制韁繩、踩腳踏嘅方式，當完全準備好就開始啟動電馬。
電動機械馬分別有五個級別可調教，亦有五種速度，1為最慢，5為最快，相對一匹競賽馬最後直路階段全力衝刺嘅速度步頻。能夠調教速度就係電馬最大優點，讓各位模擬馬匹出閘後慢跑，去到比賽中段逐步加速，末段全力催策座騎到終點。
如果你有能力駕馭電馬，教練先再俾馬鞭你，讓你感受一下騎師末段鞭打推踢嘅英姿！