潮流興金融科技，滙豐工商金融噚日搞咗個數碼峯會，等一班中小企業交流交流，會上展出唔少新技術，好似來自美國機器人公司Hanson Robotics嘅機械人Sophia，就非常吸睛。
話說前排滙豐香港工商金融一哥陳樑才（Albert）退休，之前睇開滙豐中國嘅新一哥趙民忠（Terence）剛接棒一個月，首次見傳媒，就即場示範同Sophia傾幾句。Terence見Sophia咁好傾，就話不如邀請佢做助手，可惜好快俾Sophia拒絕咗，話要問過老闆先。
雖然滙豐工商金融無Sophia咁立體嘅機械人，但其實年初已經研發咗虛擬助手（Chatbot）Amy解答客戶問題。Terence話，Amy至今已經收到3.8萬個查詢，解答成功率高達84%。不過，Amy間中收到唔少有趣問題，好似問佢有冇男友咁，真係難答啲。