繼月初有10名該台本地員工被裁後，樂視體育香港首席執行官賴汝正亦已請辭。樂視方面喺噚日發新聞稿證實，亦強調來季香港樂視頻道仍然會有英超賽事直播，不過喺本港插旗一年左右已經發生咗咁多事，都咪話唔令人憂心來季係咪真係仲有英超直播睇。
出聲明證實賴汝正辭職
早年以天價奪取英超直播權嘅樂視，成立初期喺香港招兵買馬，羅致咗唔少評述員同埋體育記者，亦有招攬其他電視台嘅高層，好似賴汝正就係由「現在台」過檔。不過，自從財困消息傳出後，樂視香港多番傳出拖糧及裁員消息，今個月初更有10名香港員工收到大信封。樂視喺周三發出嘅新聞稿確定賴汝正請辭消息，亦透露會由香港首席運營官詹挺，全權接手負責樂視體育香港業務。樂視方面更表示，樂視體育香港會喺近期有「重大體育版權的利好消息」宣佈，真係唔知仲有乜嘢法寶可以使出嚟。
強調續直播英超NBA
新一季英超聯賽喺下個月11日開鑼，作為樂視體育頻道嘅最大賣點，佢哋可唔可以提供來季英超賽事直播，相信就係香港球迷最關注嘅事情。樂視強調來季會繼續保留英超及NBA直播頻道，不過距離英超開鑼尚有兩個幾星期時間，要進行直播，預計仍有支付衞星轉播費等開支，樂視到時可唔可以如期直播，外界仍抱有懷疑。國內樂視情況都相當險峻，老闆賈躍亭係咁被追債，不斷傳出破產傳聞。
樂視體育香港（LeSports HK）屬樂視體育旗下子公司，喺15年9月成立，上年8月1日啟播，提供多條體育頻道包括英超直播、NBA直播同埋體育新聞等製作，上星期喺香港舉行嘅英超亞洲盃，雖由樂視直播，但負責拍攝同製作嘅都係由英超聯方面自己搵人搞。