今季AC米蘭令人期待，因為佢哋今夏改頭換面大革新。自李勇鴻入主後，佢哋好似有無限金錢咁，隔幾日就簽一個，加埋最大牌嘅邦路斯，佢哋嘅新兵已經達雙位數字，砌到個正選陣容。有啲內地網民講笑話，李勇鴻係咪唔知買球會係包埋現有球員呢？
當小弟見到AC簽得越多人，就越戥教練「飛機仔」蒙迪拿（圖）擔心。有實力強嘅新兵嚟到，固然係好事，但一次過嚟太多，分分鐘有反效果。喺班新兵入面，列卡度洛迪古斯、基斯爾、安達施華、邦路斯、碧基亞同埋安德列干迪都有實力即刻打到正選，換言之，為咗安插呢班新兵，蒙迪拿需要由前到後重新建構AC嘅軸心，甚至基本踢法都要重新換一套。舊人有舊人嘅諗法，可能佢哋會唔滿意冇咗正選，新人亦有新人嘅適應，唔知夾唔夾到，所以呢個夏天係對蒙迪拿嘅一大挑戰。
前排有報道話，李勇鴻成為史上最闊綽嘅新班主，超越03/04球季阿巴莫域治入主車路士後嘅首季轉會開支。班主用得多錢，自然會對球隊成績有期望，好似03/04球季嘅車路士咁，雖然雲尼亞里拎到聯賽第二，但照樣要執包袱，讓路畀摩連奴。除咗班主，其實球迷嘅期望一樣咁高。預計喺未來輿論，蒙迪拿呢季嘅處境都幾大劑，假如AC成績好，唔會有人讚蒙迪拿，而係讚李勇鴻買人買得好；但如果AC成績唔掂的話，鑊自然係蒙迪拿孭，因為球迷會話班主買咗咁多有質素嘅新兵畀佢都搞唔掂。
文：咖喱