轉會市場唔經唔覺都開咗近一個月，球星轉會費不斷創新高，好似香港樓市咁，一手樓打蛇餅抽籤，二手樓有盤放兩三日就沽出，套用經理口脗，真係有買貴冇買錯。連一向精明眼嘅阿仙奴領隊雲格，都好似慌慌地咁，破轉會費紀錄買拿卡錫迪已經唔太值，𠵱家又傳想拋售八名球員，籌旗買摩納哥翼鋒湯馬士林馬。
英超前列球隊就只有亞軍熱刺仲未出手，佢哋賣走基爾獲加已經執5,000萬鎊，新一季又有歐聯踢，加埋英超直播收入，夠晒子彈擴軍。其實熱刺唔係冇做過暴發戶，2013年將加里夫巴利賣去皇馬，一口氣收番8,000萬鎊，有錢就身痕，買咗蘇爾達杜、拉美拿、荷西保連奴、基斯甸艾歷臣、查迪尼等球員返嚟，結果𠵱家得番拉美拿同艾歷臣仲喺陣中，其他就貶晒值咁放走。
正所謂一動不如一靜，熱刺領隊普捷天奴重用年輕球員，賣走基爾獲加，大可以提升捷比亞打正選，而且𠵱家出手買人，一定俾其他球會當水魚劏。不過較為意外嘅傳聞，係熱刺想買愛華頓攻中巴克里（圖）。
其實熱刺唔缺攻中，迪利阿里上季先冒起，仲有基斯甸艾歷臣，而且巴克里都係一個幾獨扭兼浪射嘅球員，喺愛華頓唔算大會，畀啲機會佢試吓無妨，相反熱刺新一季，目標係爭英超冠軍，加上歐聯打入淘汰賽，甚至爭吓本土盃賽，咁大野心，就唔好白白浪費金錢去巴克里度啦。
文：牽牛