噚日天氣熱到不得了，氣溫高達33度，難得烈日當空，87歲嘅嘉華集團主席呂志和唔怕曬，見證安達臣道石礦場移交。
最令人佩服嘅係，熱成咁，呂志和都以招牌look現身，賊仔帽、領帶、恤衫、西裝（期間有除低西裝），兒子呂耀東冇打呔，但着住西裝，望見都覺得熱上加熱。
一眾傳媒下午2時到達礦場，烈日下，有如神台上嘅燒豬，好在礦場搭建一個臨時棚，棚內設有數把附設灑水功能嘅強力風扇，算係通風。
呂志和喺吉時拜完神，出席儀式約一小時，會後回答問題仍十分精神，即使氣溫咁高，都冇乜疲態。
問到嘉華會唔會進取地出價投番安達臣道石礦場，佢話「梗係搶啦！搶唔搶到就天知道。」