「地獄廚神」Gordon Ramsay廚藝了得就係人都知，佢徒弟又掂唔掂呢？贏過「Gordon Ramsay College Scholar」比賽，揹住廚神徒弟之名嘅蔡家富（Gabriel）嚟緊就喺太古坊擺檔。
其實今次蔡家富係幫太古地產（1972），據太古地產市場推廣總監馮小玲講，以往「糖廠街市集」反應好好，唔少租戶、居民對有機食材好有需求，於是佢哋就安排7月25日至9月29日喺太古坊，逢星期一至五設「農夫擺檔」。
而蔡家富將會聯同另外兩位星級廚師黃凱欣、梁雅琳分別係8月29、15同22日，喺農夫檔內親自主理簡單新鮮、經濟實惠嘅午餐盒。蔡家富將會負責炮製田園南瓜焗飯、水果藜麥沙律，一個盛惠50大元，買飯之餘，應該可以問佢Gordon Ramsay有幾惡！