前南華足主張廣勇同南華體育會劃清界線後，前日喺fb宣佈冠名贊助盧國華所創辦嘅U13同U15青年軍參加足總青年聯賽，而前南華隊長陳偉豪就貼文：「仲好意思蒲頭？真係面皮厚過腳皮！」
「油王」張廣勇過去三季出任南華足主，任內除兩奪社區盃外，連續三季冇贏任何錦標，南華會季後決定「自降」甲組，而張廣勇之後同南華會劃清界線，但佢簽入嘅九名球員，合約至今仲未傾掂數。前日，張廣勇嘅先科（亞洲）公佈冠名贊助由球壇名宿盧國華所創辦嘅雅力足球學校，今季借流浪足球會會籍，以「先科雅力」名義派出U13及U15參與足總青年聯賽。
正追討合約賠償嘅前南華隊長陳偉豪之後喺fb貼文：「仲好意思蒲頭呀？真係面皮厚過腳皮！希望呢間足球學校唔會又做苦主啦，不過贊助足球學校係好㗎，因為就算走數，班小朋友應該唔會請律師告你嘅。」睇落就覺得句句有骨嘞。之後，偉豪又喺fb上載同保贊嘅合照，並寫上「My partner有緣再聚」，據聞佢係專登返港處理同南華嘅合約問題。