立法會今個會期收爐後，唔少議員雞飛狗走，到訪不同國家旅遊充電，有一批議員日前搶閘啟程，隨立法會工商事務委員會到訪以色列考察，為創科及再工業化等議題取經，當中包括首次以議員身份外訪嘅公民黨黨魁楊岳橋，AY喺facebook匯報行程時一度感觸良多，直言離開以色列創新局時心情悲憤交集，點解？
AY引述該局高層話早喺2014初，以色列已經同港府簽署合作備忘，鼓勵兩地機構合作推動產業研究同科技發展，3年過去，進度卻係零，除咗握手影相乜都冇做過，相比同樣有合作關係嘅台北、深圳、廣州，香港可謂包尾。
隨團嘅資訊科技界代表莫乃光聽完亦氣頂，喺fb留言，「香港政府就是這樣，簽MOU像集郵，簽咗當做咗，令外國政府大開眼界」。