最近幾星期，恒指只係升左1,500點，上番26500，個個好似突然訓醒咁，大合唱話大時代就快黎啦，要入貨啦! 大佬，恒指喺年半前低位萬八點左右起步，升咗18個月，夾埋彈左成萬點，依家先ff大時代再臨？會唔會太搞笑、太後知後覺（笑樣）。
其實大家唔駛太着重咩大時代再臨，今日個市同2年前大時代好唔同。大家亦唔好ff會好似兩年前咁，單日爆升2000點，雞犬皆升，買咩升咩。今輪升市，成個格局係慢牛狀態，每個升浪過後調整唔多跟住又升過，車都無機會畀你上，而且升市側重指數成份股同重磅而且有盈利有增長嘅股票度，個市去到咁嘅狀態，同以前大上大落完全唔同，原因在於北水！
北水唔聲唔聲，原來已經經港股通買左超過5,000億港紙嘅貨，仲要買完唔沽番出嚟，最簡單，中學econ供求定律，供應少咗，需求不變，價自然升。北水扣起嘅貨加埋外資基金持倉，貨源早已歸邊，以前只會出現喺細價股嘅情況，今日竟然普遍咁出現喺好多隻重磅指數股，所以要個市有深度調整再畀散戶入貨，機會似乎越嚟越低。
無貨喺手嘅，SORRY啦，你只能眼白白睇住股價繼續水漲船高，繼續唔敢入貨，繼續等待直到永遠，呀，唔係，直到北水唔玩為止至真。
Melody
http://www.facebook.com/whichroad
本欄逢周三刊出